وہ دِلنواز ہے لیکن نظر شناس نہیں
مرا علاج میرے چارہ گر کے پاس نہیں

تڑپ رہے ہیں زُباں پر کئ سوال مگر
مرے لئے کوئی شایانِ التماس نہیں

ترے جلو میں بھی دِل کانپ کانپ اُٹھتا ہے
مرے مزاج کو آسودگی بھی راس نہیں

کبھی کبھی جو ترے قُرب میں گزارے تھے
اب اُن دِنوں کا تصور بھی میرے پاس نہیں

گزر رہے ہیں عجب مرحلوں سے دِیدہ و دِل
سحر کی آس تو ہے ، زندگی کی آس نہیں

مجھے یہ ڈر ہے تیری آرزو نہ مِٹ جائے
بہت دِنوں سے طبعیت مری اُداس نہیں

محرومِ خواب دیدہِ حیراں نہ تھا کبھی
تیرا یہ رنگ اے شبِ ہجراں نہ تھا کبھی

تھا لطفِ وصل اور کبھی افسونِ انتظار
یوں دردِ ہجر سلسلہءِ جنباں نہ تھا کبھی

پُرساں نہ تھا کوئی تو یہ رسوائیاں نہ تھیں
ظاہر کِسی پہ حالِ پریشاں نہ تھا کبھی

ہر چند غم بھی تھا مگر احساسِ غم نہ تھا
درماں نہ تھا تو ماتمِ درماں نہ تھا کبھی

دِن بھی اُداس اور میری رات بھی اُداس
ایسا تو وقت اے غمِ دوراں نہ تھا کبھی

دور خزاں میں یوں میرے دِل کو قرار ہے
میں جیسے آشنائے بہاراں نہ تھا کبھی

کیا دِن تھے جب نظر میں خزاں بھی بہار تھی
یوں اپنا گھر بہار میں ویراں نہ تھا کبھی

بے کیف و بے نشاط نہ تھی اس قدر حیات
جینا اگرچہ عشق میں آساں نہ تھا کبھی

دیارِ دِل کی رات میں چراغ سا جلا گیا
مِلا نہیں تو کیا ہوا ، وہ شکل تو دِکھا گیا

جدائیوں کے زخم دردِ زندگی نے بھر دئے
اُسے بھی نیند آ گئی ، مجھے بھی صبر آ گیا

وہ دوستی تو خیر اب نصیبِ دُشمناں ہوئی
وہ چھوٹی چھوٹی رنجشوں کا لُطف بھی چلا گیا

پُکارتی ہیں فُرصتیں ، کہاں گئیں وہ صحبتیں
زمیں نِگل گئی انہیں یا آسمان کھا گیا

یہ کِس خوشی کی نیند پر غموں کو نیند آگئی
وہ لہر کِس طرف گئی ، یہ میں کہاں سما گیا

جو اور کُچھ نہیں تو کوئی تازہ زخم ہی مِلے
میں ایک ہی طرح کی زندگی سے تنگ آ گیا

گئے دِنوں کی لاش پر پڑے رہو گے کب تلک
الم کُشو ، اُٹھو کہ آفتاب سر پر آ گیا

ناصر کاظمی